Íþróttahátíðin Reykjavik International Games er um helgina

Fréttatilkynning frá Íþróttabandalagi Reykjavíkur – 19.janúar 2012
Íþróttahátíðin Reykjavik International Games er um helgina

Alþjóðlegu Reykjavíkurleikarnir fara fram í fimmta sinn dagana 19.-22.janúar næstkomandi. Það er Íþróttabandalag Reykjavíkur í samstarfi við sérsambönd ÍSÍ ásamt dyggum samstarfsaðilum sem standa að leikunum.

Í dag voru leikarnir kynntir fjölmiðlum á blaðamannafundi sem haldin var í Háskólanum í Reykjavík. Á fundinum var byrjað á því að skrifa undir samninga við bakhjarla Reykjavíkurleikanna en þeir eru Síminn og Ölgerðin.

Margt af best íþróttafólki okkar Íslendinga verður á meðal þátttakenda í keppninni um helgina. Má þar nefna frjálsíþróttakonurnar Helgu Margréti og Ásdísi Hjálmsdóttur, sundmanninn Jakob Jóhann, þríþrautarkonuna Kareni Axelsdóttur og heimsmeistarann í Crossfit, Annie Mist, sem keppir í Ólympískum lyftingum. Þá eru einnig sterkir erlendir keppendur á meðal þátttakenda og má þar nefna Carl Yngvar Christhensen, heimsmeistara unglinga í kraftlyftingum, og björtustu von Dana í sundi, Mie Ö. Nielsen.

Í tengslum við Reykjavíkurleikana verða haldnar miklar hátíðir í Laugardalnum. Opnunarhátíð verður haldin í Laugardalshöll á föstudag þar sem meðal annars Páll Óskar Hjálmtýsson og Regína Ósk syngja fyrir gesti. Þá verður Sundlaugapartý í Laugardalslauginni á laugardaginn þar sem þátttakendum og reyndar öllum Reykvíkingum gefst kostur á því að skemmta sér saman í sundi við dúndrandi tónlist Friðrik Dórs og DJ Birgiss. Þá verður lokahátíð leikanna í Laugardalshöll á sunnudagskvöld þar sem Páll Óskar þeytir skífum af sinni alkunnu snilld.